Os ydych wedi defnyddio cyllid modur, efallai y bydd iawndal yn ddyledus i chi. Darganfyddwch sut i gwyno a beth i'w ddisgwyl o'n cynllun.
Os y gwnaethoch ddefnyddio cyllid i brynu car, beic modur neu fan rhwng 6 Ebrill 2007 a 1 Tachwedd 2024, efallai y bydd iawndal yn ddyledus i chi.
Ni wnaeth llawer o fenthycwyr ddatgan gwybodaeth bwysig i gwsmeriaid am eu cytundebau. Roedd hyn yn torri deddfau a’n rheolau oedd mewn grym ar y pryd. Dyna pam rydyn ni wedi lansio cynllun i sicrhau bod pobl yn cael eu digolledu.
Ar ôl ei lansio, cafodd ein cynllun ei herio’n gyfreithiol[3] ac mae rhannau ohono wedi eu hatal. Mae disgwyl i’r achos gael ei glywed unai yn Rhagfyr 2026 neu Chwefror 2027. Hyd nes y bydd y broses gyfreithiol wedi dod i ben, nid oes angen i fenthycwyr gyfrifo na thalu iawndal i bobl y mae arian yn ddyledus iddynt o dan y cynllun.
Os caiff y cynllun ei amddiffyn, ac na chaiff y dyfarniad ei apelio, rydym yn disgwyl i daliadau o dan y cynllun gychwyn yn 2027. Darllenwch fwy am sut yr ydym yn ymdrin â’r her[4].
Y peth gorau y gallwch ei wneud, os oes gennych bryderon, yw cwyno i’ch benthyciwr.
Os hoffech dderbyn diweddariadau ar ein gwaith sy'n ymwneud â chwynion cyllid modur a'r hyn y mae'n ei olygu i chi, cofrestrwch ar gyfer diweddariadau e-bost[5]. Gallwch ddad-danysgrifio[6] ar unrhyw adeg.
I bwy mae hyn yn berthnasol
Rydym yn amcangyfrif bod 37% o gytundebau a wnaed ar y pryd yn gymwys i gael iawndal. Mae hynny tua 12.1 miliwn o gytundebau.
Gall hyn fod yn berthnasol i chi os:
- Bu i chi ddefnyddio cyllid modur ar gyfer cerbyd modur, er enghraifft, car, beic modur, fan neu ‘campervan’ rhwng 6 Ebrill 2007 a 1 Tachwedd 2024 (mae hyn yn cynnwys cytundebau hurbwrcas (Hire Purchase), fel Pryniant Contract Personol ‘Personal Contract Purchase’[7]), a
- Ni ddwedwyd wrthych am drefniadau penodol rhwng y benthyciwr a'r brocer (pwy bynnag a drefnodd eich benthyciad).
Mae'r trefniadau hyn yn cynnwys:
- Trefniant comisiwn yn ôl disgresiwn (DCA), a oedd yn caniatáu i'r brocer addasu'r gyfradd llog a dalwyd gennych i gael comisiwn uwch.
- Trefniant comisiwn uchel, lle roedd swm y comisiwn o leiaf 39% o gyfanswm cost credyd (y llog a'r taliadau am eich benthyciad) a 10% o'r benthyciad.
- Cysylltiadau cytundebol. Dyma lle dim ond un benthyciwr a ddefnyddiodd eich brocer neu cafodd un benthyciwr yr hawl cyntaf i wrthod eich benthyciad. Fodd bynnag, ni fydd cysylltiadau cytundebol yn cael eu cynnwys pe bai cysylltiadau gweladwy rhwng y benthyciwr, y gwneuthurwr a'r deliwr masnachfraint. Er enghraifft, lle roeddent yn rhannu enw cyffredin neu debyg.
Mae rhai eithriadau. Bydd eich cytundeb yn cael ei ystyried yn deg, os:
- Oedd y comisiwn yn £120 neu lai ar gyfer cytundebau a ddechreuodd cyn 1 Ebrill 2014 a £150 neu lai o'r dyddiad hwnnw ymlaen. Mae symiau comisiwn is na’r lefelau hynny yn annhebygol o fod wedi dylanwadu ar ymddygiad y brocer neu benderfyniad unigolyn.
- Nid oeddech chi'n talu am unrhyw log.
Ni fydd ein cynllun yn berthnasol i chi os:
- Oeddech chi yn lesu modur gyda Contract Hurio Personol (PCH)[8].
- Yw eich cwyn wedi cael ei ystyried yn flaenorol gan y Gwasanaeth Ombwdsmon Ariannol neu wedi ei benderfynu gan y llys.
- Rydych chi eisoes wedi derbyn iawndal.
- Oedd eich cytundeb dros £25,000 cyn 6 Ebrill 2008 neu os oedd at ddibenion busnes.
- Roedd gennych fenthyciad gwerth uchel (mae’r hyn sy’n cael ei gyfri’n fenthyciad gwerth uchel yn wahanol bob blwyddyn. Darllenwch isod i ddarganfod mwy).
Mewn nifer fach iawn o achosion, efallai y byddwch hefyd wedi rhedeg allan o amser i gael iawndal. Os yw hyn yn berthnasol i chi, bydd eich benthyciwr yn egluro pam.
Sut i gwyno am gyllid modur
-
1
Cysylltwch â'ch benthyciwr
Chwiliwch ein rhestr o fenthycwyr i ddod o hyd i fanylion cyswllt perthnasol, llythyr cwyn neu e-bost templed, neu ddolen i ffurflen gwyno bwrpasol y benthyciwr.
Archwilio rhestr benthycwyr [2]
Dod o hyd i’ch benthyciwr
Os nad ydych chi'n siŵr pwy yw eich benthyciwr:
- Gwiriwch hen ddatganiadau banc.
- Cysylltwch â'r masnachwr lle cawsoch y car.
- Ceisiwch wirio eich ffeil credyd gan y gallai eich benthyciwr gael ei restru yno. Gallwch hefyd geisio gwirio asiantaeth cyfeirio credyd Equifax's Car Finance Checker[11], sy'n cynnwys y rhan fwyaf o gofnodion cyllid ceir yn ôl i 2007. Gallwch hefyd wirio'ch ffeil credyd am ddim trwy Experian a TransUnion. Darganfyddwch sut i gael mynediad at eich ffeil credyd am ddim o Swyddfa'r Comisiynydd Gwybodaeth[12].
-
2
Rydych yn derbyn ymateb gan eich benthyciwr
Mae’n rhaid i’ch benthyciwr ymateb i’ch cwyn gan ddweud wrthych a oes iawndal, a faint sy’n ddyledus i chi. Fodd bynnag, mae amseru’r ymateb hwnnw yn ansicr oherwydd bod y cynllun wedi’i herio yn gyfreithiol a rhannau ohono wedi’u hatal.
Hyd nes y bydd y broses gyfreithiol wedi dod i ben, nid oes angen i fenthycwyr gyfrifo na thalu iawndal i bobl y mae arian yn ddyledus iddynt o dan y cynllun.
Os nad oes iawndal yn ddyledus i chi
Oherwydd nad yw rhai rhannau o’r cynllun wedi’u hatal, bydd rhai cwsmeriaid yn cael gwybod gan eu benthyciwr nad oes unrhyw iawndal yn ddyledus iddynt. Bydd hyn yn seiliedig ar y rhannau o’r cynllun sy’n dal i fod yn berthnasol.
Os yw hyn yn berthnasol i chi, dylai eich benthyciwr roi gwybod i chi erbyn y dyddiadau isod, oni bai:
- Eu bod yn credu bod eich cwyn allan o amser.
- Bod eich cwyn yn ymwneud â chysylltiad cytundebol lle’r oedd cysylltiad gweladwy rhwng y benthyciwr, y gwneuthurwr a’r deliwr masnachfraint, er enghraifft, oherwydd eu bod yn rhannu enw cyffredin neu debyg.
Felly os nad ydych yn clywed gan eich benthyciwr erbyn y dyddiadau isod, nid yw hyn o reidrwydd yn golygu bod iawndal yn ddyledus i chi.
Pryd y byddant yn cysylltu â chi:
- Os dechreuodd eich cytundeb ar neu ar ôl 1 Ebrill 2014, a’ch bod wedi cwyno erbyn 30 Mehefin 2026, dylai eich benthyciwr gysylltu â chi erbyn 18 Tachwedd 2026.
- Os dechreuodd eich cytundeb cyn 1 Ebrill 2014, a’ch bod wedi cwyno erbyn 31 Awst 2026, dylai eich benthyciwr gysylltu â chi erbyn 18 Ionawr 2027.
Os ydych yn cwyno ar ôl y dyddiadau hyn, ac nid oes iawndal yn ddyledus i chi, dylai eich benthyciwr roi gwybod i chi o fewn 5 mis o dderbyn eich cwyn.
-
3
Rydych chi'n ymateb i'ch benthyciwr
Bydd gennych 1 mis i naill ai i dderbyn neu herio ymateb y benthyciwr.
Os ydych chi'n anhapus ag ymateb eich benthyciwr
Os yw eich benthyciwr yn anfon penderfyniad iawndal atoch a'ch bod yn parhau i fod yn anfodlon, gallwch gwyno i'r Gwasanaeth Ombwdsmon Ariannol[9].
Mae'r Ombwdsmon Ariannol yn wasanaeth am ddim sy'n datrys cwynion rhwng defnyddwyr a busnesau sy'n darparu gwasanaethau ariannol.
Mae'n bwysig eich bod yn cysylltu â'r Ombwdsmon Ariannol erbyn y dyddiad a roddir yn llythyr penderfyniad iawndal eich benthyciwr, neu efallai na fyddant yn gallu helpu.
Os byddwch yn mynd â'ch cwyn i'r Ombwdsmon Ariannol, byddant yn asesu eich hawliad i sicrhau bod rheolau'r cynllun wedi'u dilyn.
-
4
Rydych chi'n derbyn taliad sy'n ddyledus i chi
Ar ôl i chi ymateb i'ch benthyciwr i dderbyn y cynnig, bydd ganddynt 1 mis i dalu eich iawndal i chi.
Efallai y bydd benthycwyr yn gofyn am rif eich cyfrif banc a'ch cod didoli i dalu iawndal i chi. Ond peidiwch â rhannu'r manylion hyn oni bai eich bod chi'n siŵr pwy rydych chi'n delio â nhw. A pheidiwch byth â rhannu eich rhif adnabod PIN a'ch cyfrineiriau gydag unrhyw un.
Defnyddio cwmnïau rheoli hawliadau (CMC)
Nid oes angen i chi ddefnyddio CMC neu gwmni cyfreithiol i gymryd rhan yn ein cynllun.
Gallwch gwyno nawr am ddim heb ddefnyddio un, ac nid oes angen i chi ddefnyddio CMC i ddarganfod a ydych chi'n gymwys. Os nad ydych chi'n siŵr pwy oedd eich benthyciwr, mae ffyrdd y gallwch chi wirio.
Os ydych chi'n cofrestru gyda CMC neu gwmni cyfreithiol, efallai y byddwch yn talu am wasanaeth nad oes ei angen arnoch, gan gynnwys hyd at 36% mewn ffioedd, gan gynnwys TAW, allan o unrhyw iawndal a dderbyniwch.
Darganfyddwch beth i'w ddisgwyl os byddwch chi'n penderfynu defnyddio CMC[13], gan gynnwys sut i wirio a yw CMC neu gwmni cyfreithiol wedi'i awdurdodi i'ch helpu.
Os ydych chi'n dewis defnyddio CMC neu gwmni cyfreithiol, gwnewch yn siŵr nad ydych eisoes wedi cofrestru gyda chwmni arall. Efallai eich bod wedi cofrestru heb sylweddoli hynny. Os ydych chi'n cofrestru gyda mwy nag un cwmni, efallai y bydd yn rhaid i chi dalu ffioedd i ddod â'r cytundeb i ben neu gael mwy nac un cynrychiolwr sy'n hawlio ffioedd llwyddiant. Gallai hefyd achosi oedi i chi dderbyn yr arian sy'n ddyledus i chi.
Eisoes wedi cofrestru gyda CMC neu gwmni cyfreithiol?
Os ydych yn penderfynu nad ydych bellach eisiau defnyddio CMC neu gwmni cyfreithiol, gallwch ddod â'ch cytundeb i ben. Ond efallai bydd ffi yn ddyledus. Dylai'r ffi fod yn rhesymol a dylai adlewyrchu'r gwaith y mae'r CMC neu'r cwmni cyfreithiol eisoes wedi'i wneud.
Mae'r rhan fwyaf o hawliadau cyllid modur yn y camau cychwynnol yn unig, felly dylai unrhyw ffioedd y gofynnir i chi eu talu gyd-fynd â'r gwaith a wnaed hyd yn hyn.
Dylech ddisgwyl i'r cwmni egluro’n glir y gwaith hwn a sut mae eu costau wedi'u cyfrifo. Os yw ffioedd yn ymddangos yn uchel neu os yw'r disgrifiad o'r gwaith yn amwys, gan ddefnyddio termau generig fel 'dilyniant achos' neu 'adolygiad ffeiliau' heb fanylion, dylech ofyn am ddadansoddiad ac i'r cwmni gyfiawnhau'r taliadau hynny.
Cwyno am CMC neu gwmni cyfreithiol
Os ydych yn anhapus â sut mae CMC neu gwmni cyfreithiol wedi ymdrin â’ch achos, gallwch gwyno.
Os ydych yn meddwl eich bod wedi cael eich cofrestru heb eich caniatâd, eich camarwain neu eich trin yn annheg, gallwch ofyn am adael eich cytundeb am ddim. Efallai y bydd iawndal yn ddyledus i chi hefyd gan y CMC neu gwmni cyfreithiol. Os nad yw’r CMC neu gwmni cyfreithiol wedi dilyn y gyfraith yn y ffordd y maent wedi ymdrin â’ch achos a’ch data, efallai na fydd ffioedd yn briodol.
Cwynwch i’r CMC neu gwmni cyfreithiol fel cam cyntaf. Gallwch ddefnyddio ein llythyr templed (DOC)[14] i’ch helpu i ddrafftio eich cwyn.
Os ydych yn anhapus â’r ymateb a gewch, neu os nad ydyn nhw’n ymateb o fewn 8 wythnos, gallwch fynd â’ch cwyn i:
Mynd â'ch cwyn i'r llys
Gallwch hefyd ddwyn hawliad am eich comisiwn cyllid modur trwy'r llys. Os ydych chi'n ystyried yr opsiwn hwn, dylech feddwl am gael cyngor cyfreithiol annibynnol.
Mae cymryd rhan yn ein cynllun yn debygol o fod yn symlach ac yn cynnig mwy o sicrwydd na mynd â'ch hawliad i'r llys. Ar ôl i ffioedd cyfreithiol gael eu dynnu, gallech gael llai.
Faint y gallech ei gael
Bydd pobl sy’n cael iawndal yn derbyn ar gyfartaledd tua £830 fesul cytundeb, ond bydd hyn yn amrywio, gyda rhai pobl yn cael mwy a rhai yn cael llai.
Rydym wedi gosod rheolau ar gyfer sut mae cwmnïau yn asesu hawliadau ac yn cyfrifo unrhyw iawndal. Rydym yn goruchwylio cwmnïau'n agos i wneud yn siŵr eu bod yn eu dilyn.
Nid yw'r math hwn o fenthyca yn cael ei gwmpasu gan y Cynllun Iawndal Gwasanaethau Ariannol, felly os bydd eich benthyciwr yn mynd allan o fusnes, efallai na fyddwch yn cael unrhyw iawndal.
Amddiffyn eich hun rhag sgamiau
Rydym wedi derbyn adroddiadau o sgamwyr yn cysylltu â phobl[17] ac yn esgus eu bod o fenthycwyr cyllid modur, gan gynnig iawndal ffug.
Er mwyn eich helpu i wirio eich bod yn delio â chwmni dilys, chwiliwch ein rhestr o fenthycwyr cyllid modur[11] a gwnewch yn siŵr bod y manylion sydd gennych yn cyfateb i fanylion y cwmni gwirioneddol.
Dylech hefyd fod yn ymwybodol o sgamwyr sy'n esgus bod o'r FCA. Ni fyddwn byth yn gofyn i chi drosglwyddo arian atom ac ni fyddwn byth yn gofyn am eich rhif adnabod PIN a'ch cyfrineiriau cyfrif banc.
Darganfyddwch sut i adnabod cyfathrebiadau FCA ffug[17].
